Hoxe foi o día no que finalmente acabei por decidirme e comezar un blog. Esta decisión foi precipitada por unha reflexión que facía de camiño para casa, despois de botar unhas horas montando na BMX cos meus amigos; canto desfruto transmitindo a información que rodea o noso mundo. Son unha persoa que procura sempre ter unhas ideas sólidas e ben formadas, polo que entendo que a miña visión pode resultar interesante ao lector medio.
Ademais de ter o sentimento de poder ser capaz de facer un bo traballo con este blog, outro dos motivos que me impulsou a realizalo foi o da obriga; sentía que era o meu deber devolver algo ao mundo da BMX que tantas cousas me ensinou, tanta xente me deu pé a coñecer e tanto mundo me permitiu ver. Fico abraiado cada vez que me decato do estado mental que compartimos aqueles que sentimos verdadeira paixón por este mundo, independentemente do nivel cultural, do entorno social ou mesmo da nacionalidade. Precisamente, este será o factor que fará deste blog algo distinto de calquera outro, polo menos de calquera outro do meu coñecemento, a transformación do foráneo en algo próximo.
O obxectivo principal que sostén este blog é o de botar abaixo a barreira idiomática que dificulta a comprensión das novas diarias para aqueles riders non anglofalantes que teñen o mesmo dereito de desfrutar de entrevistas dos seus riders favoritos, coñecer o correcto nome dos trucos, ler análises dos vídeos máis esperados ou mesmo algo tan simple como poden ser as anécdotas da industria que adoitan ficar na escuridade. Ademais de levar a cabo este labor, teño a intención de moldear levemente a idea que se ten do blog de BMX tradicional, ofrecendo contido que mostre o lifestyle presente no día a día.
Porén, agardo que esta diversificación non afecte á calidade da información en ningún momento. Teño a intención de contar con algúns colaboradores adicionados de xeito que podan ofrecer outras perspectivas interesantes. Stay tuned para coñecer as novidades que se incluirán co percurso do tempo!!
DO RIGHT, DO BIKES.
Sem comentários:
Enviar um comentário